Sosial şəbəkə profilləri izlənilir?
Daxili İşlər Nazirliyi sosial şəbəkələrdə saxta hesab izləmə, telefon izləmə və gizli giriş adı altında yayılan dələduzluqlarla bağlı vətəndaşlara ciddi xəbərdarlıq edib.
Son dövrlərdə sosial şəbəkələrdə müxtəlif şəxslərin hesablarına giriş əldə etmək, gizli şəkildə profilləri izləmək, xüsusi proqramlar vasitəsilə mobil telefonlara nəzarət etmək, eləcə də insanların kiminlə danışdığını və yazışdığını müəyyən etmək adı altında paylaşımların sayı artmaqdadır.
Daxili İşlər Nazirliyinin Mətbuat Xidmətindən verilən məlumata görə, internet məkanında, xüsusilə sosial platformalarda yayılan bu tip reklamlar və cazibədar təkliflər reallığı əks etdirmir və tamamilə saxtadır.
Nazirlik bildirir ki, ödəniş qarşılığında bu cür “xidmətlər” təklif edən səhifələr əslində dələduzluq məqsədi güdür. Həmin şəxslərin əsas niyyəti vətəndaşların şəxsi məlumatlarını, xüsusilə bank kartı məlumatlarını ələ keçirmək və maddi zərər vurmaqdır.
DİN bir daha vətəndaşlara diqqətli olmağı, təhlükəsizlik qaydalarına ciddi əməl etməyi və heç bir halda şübhəli vədlərə inanaraq onlayn ödəniş etməməyi tövsiyə edir. Şübhəli hallar müşahidə edildikdə isə dərhal polis orqanlarına və Nazirliyin rəsmi sosial şəbəkə hesablarına müraciət olunması məsləhət görülür.
Bu Posta Reaksiyanız Nədir?
